Co fin de mellorar a atención ás vítimas da violencia de xénero elaborouse e desenvolveuse dentro dos Plans Conxuntos de Seguridade, promovidos dende a Subdelegación do Goberno en Pontevedra, a constitución dunha comisión de coordinación dirixida pola Concellaría de Muller de Soutomaior a través do CIM (Centro de Información á Muller).

Entre os asistentes á reunión, que tivo lugar o venres no Multiusos de Arcade, estivo presente a Xefa da Unidade contra a Violencia sobre a Muller da Subdelegación de Goberno en Pontevedra, Lucia Muradas Arcay; ademais do Alcalde de Soutomaior, Agustín Reguera, a Tenente-Alcalde, Dores Cernadas, o Sarxento da Garda Civil de Soutomaior, Jose Miguel Silva, como tamén as representantes do CIM e Servizos Sociais do Concello.

Dende o Concello de Soutomaior, coa colaboración da Subdelegación de Goberno e a través da Concellaría da Muller, avógase por desenvolver un plan de coordinación, cooperación e colaboración entre as diferentes administracións do municipio co fin de optimizar recursos e con iso mellorar a seguridade das residentes.

No terreo da protección das vítimas de Violencia de Xénero, foron moitos os avances logrados, tales como a creación dun rexistro único dos casos, o coñecemento de todas as ordes existentes no Concello tanto pola GC/CNP coma pola Policía Local, a implicación dos gobernos locais na xestión de Servizos de Emerxencia, etc.

Se o que pretendemos é unha atención integral das vítimas, temos que engadir un elemento máis, a contemporaneidade, é dicir, todos os axentes implicados na detección, protección e atención das vítimas, traballando ao mesmo tempo co fin de conseguir devolver á muller ao seu estado inicial, á súa situación antes de ser vítima.

O Concello, é a administración local máis próxima aos veciños de Soutomaior, polo que se configura como espazo privilexiado para a intervención con mulleres vítimas de violencia. Por iso, constituíuse unha Mesa de Coordinación para a Mellora á atención de Vítimas de Violencia de Xénero, pretendendo engadir, fomentar e desenvolver accións e fórmulas preventivas xunto a respostas ou solucións que se presten ante unha situación identificada como violencia de xénero no municipio de Soutomaior.

Tódolos asistentes á mesa asumiron o compromiso real de mellorar a coordinación entre institucións, co obxectivo de mellorar a calidade de resposta ás mulleres vítimas. O Alcalde, Agustín Reguera, felicitou a iniciativa a Xefa da Unidade da Subdelegación de Goberno en Pontevedra, Lucia Muradas, e ás responsables do CIM de Soutomaior (Centro Información á Muller), animounas a seguir mellorando as prestacións de servizos ás vítimas de malos tratos, desexando unha continua cooperación entre todos.

Na I Mesa tratáronse temas como o sistema de funcionamento do seguimento integral de casos de violencia, por parte das Forzas e Corpos de Seguridade; a comparativa de datos de violencia de xénero no municipio; e a proposta dun convenio de aloxamento temporal para as vítimas.

A Comisión reunirase con carácter trimestral, quedando aberta a mesa a outras administracións, institucións e organizacións que pola súa implicación no tema sexa conveniente incluílas.