AGUSTÍN REGUERA inaugura o Campo de Fútbol de “O Candán”

O campo de fútbol do Candán xa ten herba sintética e o equipo que o disfruta, o Soutomaior, poderá empezar a liga coas mellores instalacións.

O Alcalde de Soutomaior, Agustín Reguera, o de Deportes, Francisco Iglesias, e outros membros da Corporación encargáronse de inaugurar o día 14 de agosto esta instalación, na que se investiron preto de 350.000 euros e que será o segundo campo de fútbol de céspede artificial do municipio.

O proxecto supuxo un investimento total de 400.000 euros, dos que o "Fondo Estatal para o Emprego e a Sostibilidade Local" se fai cargo de 175.000 euros, o Concello fíxose responsable doutros 175.000 euros grazas a un préstamo sen intereses a 12 anos concedido pola Deputación Provincial. E finalmente, a Deputación de Pontevedra financirá a construción de novos vestiarios e outras obras en bancada, que aínda quedan por investir.

Na inauguración presentáronse todos os equipos do Soutomaior, que recibiron un recordo desta data e houbo unhas palabras do Alcalde, ademais da tradicional bendición das instalacións, a cargo do párroco don José Vidal. Ademais, o rexedor descubriu unha praza inaugural acompañado de todos os presidentes históricos da formación.

A implantación do céspede artificial no Candán era unha promesa do alcalde, que cando o municipio se acolleu ao plan da Deputación para instalar a herba artificial, incluíu o campo de Arcade na iniciativa. "Sempre dixemos que o seguinte sería O Candán", explicou o edil de Deportes, quen desexou sorte na nova tempada ao equipo que o disfrutará. Militan en terceira rexional e prevese que nesta tempada se incremente a demanda de pequenos para formarse nos equipos de base.