O Castelo de Soutomaior acolle a rodaxe de PIRATAS, nova serie de Telecinco

Navíos, duelos a espada, alxubes, execucións, rescates en sombríos mosteiros, combates a bordo de acantilados e espectaculares abordaxes en alta mar. Homes de honra e mulleres de armas tomar. Un tesouro cobizado durante máis de 30 anos e unha misión desesperada. Aventuras, vinganzas, amor e humor. E, por suposto, 'Piratas'. Óscar Jaenada e Pilar Rubio liderando o elenco da nova serie de Telecinco que o luns 23 de agosto iniciou a súa gravación en Galicia.

A primeira ficción de televisión que aborda este xénero no noso país estará ambientada no século XVIII e contará as aventuras de Álvaro Mondego (Óscar Jaenada), un nobre vido a menos, canalla, descarado, enganador e cunha paixón desmedida polas mulleres que, obrigado polas circunstancias, ha de converterse en pirata.

No devir da súa nova sorte, Montego encontrarase cunha aguerrida e sensual pirata, interpretada por Pilar Rubio, para a cal 'Piratas' supón o seu debut na ficción televisiva.

O 95% da nova ficción de Telecinco, producida en colaboración con Mandarina Producciones, transcorre en localizacións naturais de Galicia. Dende as praias e acantilados da Costa da Morte, ata os camiños e os bosques da Galicia interior. Fervenzas, pazos, igrexas, canellas, mosteiros, pontes e castelos. De Soutomaior a Cambados, de Tui a Silleda.

Esta semana estiveron a gravar nos xardíns e dependecias interiores do Castelo de Soutomaior varias escenas para a serie que se emitirá en horario de máxima audiencia a partir de xaneiro do 2010.

Agustín Reguera, alcalde de Soutomaior, deulle a benvida en persoa a PILAR RUBIO "me encanta Soutomaior, la comida está muy buena, teneis una materia prima de calidad y la gente es muy hospitalaria, ademas da gusto trabajar en este entorno natural" coméntalle a protagonista da serie ao alcalde e á concelleira de cultura, Dolores Cernadas. Agustín Reguera tamén estivo a conversar con veciños de Arcade e Soutomaior que actúan como figurantes na nova serie de Telecinco.