A Mesa Local do Comercio de Soutomaior avala o proxecto de "Renovación da instalación de saneamento do Mercado Municipal"

Onte, tivo lugar na Sala de Comisións da Casa do Concello unha reunión da MESA LOCAL DE COMERCIO DE SOUTOMAIOR para informar do proxecto de "Renovación da instalación de saneamento do Mercado Municipal" como marca a nova Lei de Comercio Interior de Galicia, sendo a MESA a conexión entre o sector do comercio e a administración.

A praza de abastos de Arcade do Concello de Soutomaior iniciará nos próximos días unhas obras de reforma co obxectivo de mellorar as instalacións e modernizar a súa imaxe para facela máis atractiva de cara aos clientes.

O proxecto de actuación, que conta cun prazo de execución dun mes e medio, recibiu onte o respaldo da mesa local do comercio, constituída polo alcalde de Soutomaior, Agustín Reguera; a edil Dores Cernadas; o presidente da Asociación de Empresarios de Arcade e Soutomaior (A.E.A.S.), Andrés Cal; o vicepresidente da Asociación de Amas de casa, consumidores e usuarios Rías Baixas, Marisol Hernández; e a representante da Xunta de Galicia, Rosa María Rivas Lois.

Según informou onte o alcalde de Soutomaior, Agustín Reguera, o proxecto foi ben recibido polos representantes das asociacións de empresarios e consumidores, que acordaron por unanimidade considerar a reforma do mercado como beneficiosa para o municipio.

As obras de modernización da praza de abastos levaranse a cabo co fin de lograr o correcto funcionamento da instalación e impulsar a demanda dos locais comerciais sen uso, posto que actualmente se encontran catro baleiros. As obras consistirán nun cambio do pavimento interior, a mellora da instalación do saneamento, a renovación dos aseos, a impermeabilización do forxado para evitar a filtración de auga aos locais de planta baixa e a limpeza da fachada exterior, entre outras melloras.

Os traballos comezarán antes de que conclúa o mes e está prevista a finalización no mes de decembro.