A Biblioteca Municipal de Soutomaior ofrece varios cursos dirixidos a maiores de 55 anos

O Concello de Soutomaior pon en marcha, a través do proxecto BIBLIOWINK (Biblio aceno) da Biblioteca Municipal LUIS SEOANE, unha serie de cursos para maiores de 55 anos, cuxa finalidade é atraer a este grupo de idade á biblioteca mediante a oferta de diferentes actividades de carácter cultural. Os cursos, na súa maior parte, son impartidos por persoal voluntario da Biblioteca de Soutomaior.

Entre as iniciativas encóntranse:

CURSO DE INGLÉS BÁSICO

Práctico e participativo, onde a través da linguaxe oral e o xogo se ofrece aos participantes as ferramentas básicas para defenderse en inglés en situacións cotiás (comunicar datos persoais, gustos, viaxes, médico, vacacións).

As clases comezan este mércores 6 de abril celebrándose todos os mércores de 11:30h a 12:30h da mañá na Biblioteca Municipal situada en Arcade. O curso terá unha duración de 12 horas e un máximo de 14 prazas dispoñibles.

TALLER "COMO ACTIVAR A MENTE" (exercicios para mellorar a memoria e a concentración)

Dentro do programa dirixido ás persoas maiores de Arcade para contribuír a atrasar as perdas provocadas polo envellecemento e optimizar ao máximo as súas capacidades; unha das accións é a estimulación cognitiva e sensorial que consiste en exercicios para mellorar a memoria, a concentración e a atención. Ademais durante esta etapa da vida é imprescindible tomar conciencia da importancia do coidado dos sentidos.

Ao finalizar cada taller ofrecerase un espazo de reflexión para resolver dúbidas, coñecer as súas aptitudes, gustos e necesidades individuais para orientalos en actividades a realizar para ocupar o seu tempo, realizar cousas pendentes na súa vida, etc.

As clases comezan o xoves 7 de abril celebrándose posteriormente tódolos  martes de 17:00h a 19:00h da tarde no Centro Social de Maiores de Arcade. Realizarase durante os meses de abril e maio e estarán dispoñibles un total de 20 prazas.

CURSO DE AUTOMASAXE

Para aqueles interesados en coñecer esta técnica como remedio ou alivio a enfermidades como o estrés, artrite, artrose, dores musculares ou cervicais, entre outras.

As clases comezan o luns 11 de abril de 11:30h a 12:30h celebrándose todos os luns en Centro Social de Maiores de Arcade. Hai 14 prazas dispoñibles e durará un mes.

Para máis información e reserva de prazas preguntar no mostrador da Biblioteca Municipal ou no Centro Social de Maiores de Arcade. Poden chamar o 986 700 291.