A Escola Infantil de Soutomaior "Galiña Azul" clausura o curso cun acto protagonizado polos mais peques

O pasado venres ás 18 h da tarde tivo lugar o acto de clausura da Escola Infantil Municipal "Galiña Azul" de Soutomaior.

A xornada desenvolveuse no Multiusos de Arcade, á que asistiron o Alcalde de Soutomaior, Agustín Reguera, e a Concelleira de Educación, Marisa Comesaña; ademais de contar coa presenza de case 200 pais, familiares e amigos que presenciaron o espectáculo ofrecido polos seus peques.

A escola infantil de Soutomaior foi inaugurada o 16 de setembro do 2009 pola Conselleira de Traballo e Benestar, Beatriz Mato, acompañada pola delegada territorial da Xunta en Vigo, Lucia Molares, e o Alcalde de Soutomaior Agustín Reguera.

A Xunta de Galicia investiu, nas novas instalacións de case 400 metros cadrados, un total de 209.565 euros; mentres que o Concello de Soutomaior investiu unha contía aproximada de 106.520 €, 46.520 destinados ao equipamento da escola e o resto para finalizar a obra, xa que debido ós problemas económicos da construtora, o goberno local se viu obrigado a rescindir o contrato e concluír a obra pola súa conta, desembolsando outros 60.000 €.

"Hoxe os protagonistas son eles, os mais pequenos, é unha gran satisfacción velos actuar" comenta Agustín Reguera mentres non perde de vista as actividades do acto, prosegue "queremos o mellor para os cativos, por iso temos encargado un proxecto para equipar ás instalacións da escola infantil con aire acondicionado".