O Concello de Soutomaior regalará unha FRIDA como símbolo do traballo artesanal das mulleres

Con motivo da celebración do DÍA INTERNACIONAL DA MULLER, hoxe 8 de Marzo de 2011, o Concello de Soutomaior, mediante o Centro de Información á Muller (CIM), dependente da Concellaría de Muller, Servizos Sociais e Sanidade, no seu día convocou o I CONCURSO DE DESEÑO ARTESANAL "Arte-sá", co obxectivo xeneral de promover, fomentar e divulgar o traballo artesanal e artístico das mulleres.

MARÍA MEIJÓN BRUQUETAS, gañadora desta primeira edición do concurso, recibirá hoxe o primeiro e único premio de 600 euros de mans do alcalde de Soutomaior, Agustín Reguera. Así mesmo, farase entrega dun premio conmemorativo a todas as participantes nesta primeira edición no Multiusos de Arcade ás 19:00h. E as mulleres de Soutomaior que se acheguen ao longo do día recibirán unha FRIDA conmemorativa.

Despois de reunirse o xurado que conformaba o tribunal do "I Concurso de deseño artesanal Arte-sá", actividade incluída no II Plan de Igualdade de Oportunidades do Concello de Soutomaior, decidiuse por unanimidade que a gañadora fose MARÍA MEIJÓN BRUQUETAS pola súa obra "FRIDA". O tribunal estivo constituído por Rosa Morgado Pazos, representante da "Asociación de Mulleres Rurais Anduriña"; o artesán Carlos Rodríguez González; Bernardo Seoane e Moncho Novas, representantes da "Agrupación Artistas da Bisbarra"; técnicas do CIM e pola Concelleira de Muller, Servizos Sociais e Sanidade, Cristina González Piedras.

A obra FRIDA, é unha peza realizada totalmente a man de diversos materiais. Inspirada na figura de Frida Khalo, unha Muller forte e adiantada á súa época, implicada na vida política e cultural do momento, e que logrou transformar as grandes dores físicas que sufría nunha pintura chea de cor e de vida.

A gañadora tivo que realizar 150 unidades que serán entregadas hoxe polo DÍA INTERNACIONAL DA MULLER e que protagonizarán a CAMPAÑA MUNICIPAL DE SOUTOMAIOR, representando a súa imaxe institucional.