A Concellaría de Igualdade de Soutomaior engade unha exposición de ARTE ERÓTICO ao CONCURSO DE RELATOS "PUNTO E SEGUIDO"

O Concello de Soutomaior, dentro das actividades levadas a cabo polo Punto de información e asesoramento afectivo-sexual a través do CIM (Centro de Información á Muller) organiza a III Edición do Concurso de Relatos Eróticos "PUNTO E SEGUIDO" co obxectivo de promover unha educación sexual libre de tabús e fomentar a ruptura de estereotipos sexistas. O prazo para a presentación finaliza o 4 de novembro ás 14:00 horas e poderán ser entregados persoalmente ou por correo certificado no CIM situado no Multiusos de Arcade.

Establécese un único premio dun fin de semana para dúas persoas no Castelo de Soutomaior, que inclúe estanza a media pensión. A concesión do premio implica a aceptación por parte do gañador/a do dereito da publicación do relato por parte da Concellaría de Igualdade, Servizos Sociais e Sanidade, así como a difusión noutros medios de comunicación como, por exemplo, Internet.

Máis información no seguinte enlace BASES III Edición do Concurso de Relatos Eróticos "Punto e seguido"

 Dentro das actividades promovidas pola Concellaría de Igualdade, Servizos Sociais e Sanidade neste ano 2011 destacamos tamén a organización da I Mostra de ARTE ERÓTICO, no marco das actuacións previstas no II PIOM 2008-2011 na área de fomento da saúde e benestar.

A mostra está prevista para as primeiras semanas do mes de decembro deste mesmo ano, coincidindo coa entrega do premio do III Concurso de Relatos Eróticos "Punto e seguido".

Consistirá nunha nunha exposición directa nas instalacións do Concello de Soutomaior e unha exposición virtual na web do CIM de todas as obras seleccionadas.