CONTA COMIGO, programa desenvolvido polo Concello de Soutomaior para a Prevención da violencia de xénero

O Concello de Soutomaior está a levar a cabo o Programa CONTA COMIGO, enmarcado no proxecto de accións de prevención, sensibilización e concienciación sobre a violencia de xénero nos colexios do municipio, programa que finalizará a finais de novembro.

Para erradicar a violencia exercida contra as mulleres, a Concellería de Igualdade, Servizos Sociais e Sanidade de Soutomaior fixou unha serie de metas ao redor do obxectivo central da prevención da violencia de xénero en mozos e mozas.

Entre os obxectivos aos que aludimos:

- Sensibilizar aos alumnos e alumnas participantes sobre a violencia de xénero en xeral e de maneira particular sobre aquela que se de nas relacións de parella de adolescentes e novas.

- Analizar a violencia que se produce nas parellas de adolescentes e mozas.

- Informar e formar ao alumnado participante no desenvolvemento de habilidades que lles permitan ser capaces de afrontar os conflitos, mostrándolles pautas de actuación e informándoos dos recursos existentes en caso de agresión ou malos tratos.

- Capacitar o alumnado sobre o fenómeno da violencia nas relacións de parella, de maneira que poidan detectar situacións de malos tratos e axudar no caso de que sexa necesario.

- Eliminar, no alumnado participante, os mitos e ideas erróneas subxacentes ao fenómeno da violencia de xénero.

- Capacitar os alumnos e alumnas para que sexan capaces de detectar e recoñecer os malos tratos físicos, psicolóxico e sexual; informándoos sobre os posibles comportamentos da parella que poden significar un inicio de control esaxerado ou violencia.

- Colaborar con outras institucións doutros ámbitos (Educación, Servizos Sociais) no deseño e desenvolvemento de actividades.

A concelleira de Igualdade, Servizos Sociais e Sanidade de Soutomaior, Cristina González, clausurou o xoves pasado no Colexio Manuel Padín Truiteiro o programa CONTA COMIGO para a Prevención da violencia de xénero desenvolvido ao longo do mes de outubro, dando continuidade ao programa durante este mes de novembro no Colexio Santiago Apóstol. 

O Taller de Traballo, coordinado polo Concello de Soutomaior, está dirixido ao alumnado de secundaria; en 1º e 2º da ESO as xornadas teñen como obxectivo principal traballar sobre os seguintes conceptos: dereitos humanos, violencia, violencia de xénero, sexismo, comunicación, resolución de conflitos e autoestima. En cambio, en 3º e 4º da ESO as xornadas virarán contorna á transmisión de roles e estereotipos por medio da publicidade.