Unha nova ordenanza regulará a tenza de ANIMAIS NA VÍA PÚBLICA “Por ti. Por Soutomaior”

O Concello de Soutomaior, por primeira vez, establece normas para o comportamento de animais na vía pública. A iniciativa é o resultado das opinións recollidas polo alcalde dos residentes molestos polo desleixo dalgúns propietarios/as de cans.

A ordenanza pretende concienciar as persoas para que manteñan limpas as rúas de Soutomaior e para que se respecten as normas básicas de convivencia entre veciños "Por ti. Por Soutomaior". As multas oscilarán entre 50 e 600 euros, segundo a gravidade do asunto. Se trata dun documento que, segundo o rexedor, Agustín Reguera, "persegue facer de Soutomaior unha vina cívica, limpa, acolledora, respectuosa cos dereitos das persoas e protectora do patrimonio".

A nova ordenanza ten como obxectivo regular a tenza de animais na vía pública. Así, obrígase os propietarios dos cans perigosos a conducilos pola vía pública con correa e bozo. Prohíbese que os animais domésticos realicen as súas deposicións sobre as beirarrúas, zonas verdes ou terrazas e restantes elementos da vía pública destinados/as ao paso ou estadía da cidadanía. O/a propietario/a do animal doméstico ou quen o teña ao seu coidado está na obriga de recoller e retirar das rúas, avidas, parques e outros lugares públicos as deposicións ou materiais similares que deposite o animal, sendo o responsable da sucidade que este produza na vía pública. Así mesmo, serán sancionadas aquelas persoas que laven os animais domésticos na vía pública.

Por outro lado, quedará prohibido o acceso ou permanencia de animais domésticos ou de compañía naqueles lugares de concorrencia pública e uso público tales como parques, alamedas, praias, xardíns, piscinas, etc. nos que a súa estadía resulta desaconsellable por razóns hixiénicas ou sanitarias, ou por resultar a súa natureza e comportamento incompatibles coa actividade que en tales lugares se desenvolva.

As infraccións serán cualificadas como leves, graves ou moi graves, e o importe destas oscilará entre os 50 e 600 euros, podendo incrementarse nun 25% nas persoas que cometan infraccións reincidentes.