Impresionante despregamento dos corpos de seguridade no Colexio Santiago Apóstol de Soutomaior

A Concellaría de Protección Civil de Soutomaior e o Colexio de Santiago Apóstol foron partícipes onte dun espectacular simulacro de evacuación por causa dun incendio ficticio, no que actuaron efectivos de Protección Civil da localidade, a Policía Local, a Garda Civil, ademais de contar co apoio de Protección Civil de Redondela, Moaña, Vigo e Tomiño.

A actividade comezou no Colexio Santiago Apóstolo sobre as 11:00h da mañá, a alarma do Colexio empezou a soar, rapidamente os nenos son evacuados ás pistas deportivas tardando pouco máis de 1 minuto, as sereas dos vehículos empezan a oírse e en menos de 8 minutos os efectivos xa estaban despregados nas instalacións do centro, un camión de bombeiros, varios coches patrulla da Garda Civil e Policía Local, tres motos de Protección Civil, dous camións motobombas, un todoterreo de intervención rápida e dúas ambulancias. Só faltou o helicóptero que por motivos económicos, o seu desprazamento ten un elevado custo, e a situación de crise que estamos a vivir foi denegado pola Consellería de Presidencia de la Xunta. "É unha pena que non contásemos co desprazamento do helicóptero, laméntoo polos nenos, a ver se para o ano que vén mellora a situación económica e podemos disfrutar da súa exhibición" comenta o edil de Protección Civil de Soutomaior, Ramón Ángel Fernández.

O obxectivo da actividade foi coordinar o alumnado para unha evacuación en caso de emerxencia, ademais de mostrar aos escolares o labor que desenvolven os distintos corpos de seguridade de Estado dunha forma divertida. Simularon que dous nenos do centro estaban feridos, sendo desaloxados en padiolas por Protección Civil de Soutomaior. E para finalizar a xornada, os máis pequenos xogaron e refrescáronse baixo a calor estival dun baño de espuma nunha das pistas deportivas, ademais de refrescarse coa auga das mangueiras motobomba.