A Casa da Cultura de Soutomaior transfórmase en AUDITORIO

O Concello de Soutomaior está a levar a cabo as obras de reforma da Casa da Cultura permitindo a súa configuración como auditorio, dando pé a unha rehabilitación interior que contribuíu á optimización da eficiencia enerxética do edifico, mellorando a súa iluminación e o seu comportamento térmico e acústico.

A execución da obra "Reforma Casa da Cultura de Soutomaior" foi financiada na súa totalidade pola Deputación de Pontevedra, alcanzando un custo de 226.560 euros. O pasado luns, 28 de marzo, o alcalde de Soutomaior visitou as instalacións para comprobar o bo estado das obras que se están a levar a cabo para completar a reforma.

Acometeuse a reparación de elementos deteriorados, humedades e problemas de reverberación que presentaba anteriormente, procedendo a unha redistribución da planta principal para incorporar o novo uso.

Conta cun novo escenario rematado en madeira de carballo, que posibilitará o aproveitamento da Casa da Cultura para futuras representacións teatrais, proxección de películas, entregas de premios e celebración de eventos.

Incorporáronse novos aseos na planta principal, incluíndo un adaptado, permitindo que a planta de soto se destine exclusivamente a camerinos.

Así mesmo, renovouse o cableado e cadros de instalación eléctrica e dispúxose unha instalación de ventilación. Quedando por colocar as butacas e realizar algúns retoques para finalizar a obra.