O alcalde de Soutomaior, Agustín Reguera, e as concelleiras de Mocidade e Educación, Noelia Ocampo e Fátima Vidal, presentaron hoxe o programa da Feira do Libro que se celebrará na Alameda de Talo Río durante os días 22 e 23 deste mes. A Feira terá lugar o venres de 17.00 a 20.00 horas e o sábado de 10.00 a 14.00 horas pola mañá e de 17.00 a 20.00 horas en horario de tarde.
Durante a presentación, os tres destacaron a importancia deste evento, que pretende achegar a literatura á veciñanza de Soutomaior, independentemente da súa idade e formación. “Esta Feira do Libro está pensada para todos os públicos”, asegurou Noelia Ocampo antes de sinalar que “os lectores empedernidos poderán atopar coloquios, firmas de libros e conversacións cos autores, mentres que para os lectores casuais, ou quen estea buscando unha oportunidade para meterse neste mundo, haberá espectáculos e conferencias das principais editoriais que, seguro, axudaranos a atopar o seu libro ideal”.
Entre as invitadas atópanse as principais editoriais galegas, que non se quixeron perder a oportunidade de asistir a esta primeira edición da Feira do Libro de Soutomaior. Entre elas, Miudiño; Galaxia; Brazolinda; O Papagaio; Cuarto de inverno; Wow Play; Polygonestudios ou Tridelta. Tamén acudirán escritoras e escritores como Soledad García Rivero, Irene Alonso, ou Francisco Fernández Dávila.
Para os máis novos, haberá unha programación específica que cubrirá todas as franxas de idade, desde contacontos para os pequenos, ata conferencias sobre o mundo do cómic para o público xuvenil. Neste sentido, a concelleira de Educación asegurou que “introducir aos nenos e adolescentes no mundo da literatura é unha misión que non sempre se consegue desde os centros escolares, aínda que en Soutomaior está a facerse un traballo espléndido, por exemplo, a través dos Clubs de lectura, que contan con moitos adeptos”. Ademais, a edil de Educación lembrou que, xustamente para involucrar aos adolescentes na Feira, o acto de apertura correrá a cargo dos alumnos do IES Soutomaior e o Colexio Santiago Apóstol.
Durante o presentación anunciouse tamén a iniciativa ‘Aventúrate na Feira con ROTI’. ROTI, a mascota da Feira, entregará un pasaporte literario a todos os asistentes, que deberán ir coleccionando os selos dos diferentes postos. Cuantos máis selos acumulen, máis posibilidades haberá de gañar un agasallo nos sorteos que se realizarán ao final do evento.
“Queremos que a xente se involucre con esta iniciativa. É unha aposta nova e sabemos que o seu éxito depende en gran medida da participación veciñal. Para esta primeira edición conseguimos atraer a moitas editoriais de primeiro nivel, ademais de escritores de renome que virán presentar as súas obras a Soutomaior. Esta Feira é unha forma de achegar a cultura á veciñanza e estamos seguros de que será todo un éxito”, sentenciou o alcalde, Agustín Reguera.
.jpg)
