A escasas semanas de cumprirse o primeiro ano da pandemia orixinada polo Covid19, os Servizos Sociais do Concello de Soutomaior acaban de facer balance das súas actuacións durante a alerta sanitaria. En total, entre as diversas axudas creadas para amortecer os efectos desta crise, destináronse 34.299,89 euros aos que haberá que sumar os 20.000 en axudas directas para a hostalería.

A axuda de máis contía, cun total de 17.201,79 euros, foi a destinada a cubrir as situacións de emerxencia entre as familias máis vulnerables do municipio. Unha axuda destinada a sufragar o gasto das subministracións habituais nos seus fogares como o recibo da luz, a auga, gas, alugueiro…

Tamén destaca o importe destinado á compra de alimentos, tanto para a súa entrega directa a través dos Servizos Sociais municipais como a través de vales trocables polos propios usuarios nos supermercados, que ascende ata os 9.515,08 euros.

Do mesmo xeito, o Concello de Soutomaior destinou un total de 4.012,07 euros en axudas directas a veciños que perderon os seus empregos pola crise sanitaria e 2.270,95 euros a dotacións do fogar para familias vulnerables como lavadoras, frigoríficos e pequenos electrodomésticos.

Para finalizar está a axuda de 1.300,00 euros destinados a sufragar material escolar a familias en risco con menores ao seu cargo.