Tras a formalización e publicación do 'Plan Depotermal’ da Deputación de Pontevedra, o Concello de Soutomaior ponse en marcha para axudar aos seus veciños e veciñas a acollerse a esta iniciativa e gozar dos balnearios e spas da provincia a un custo moito máis reducido do habitual. Así, todos os interesados poden desprazarse ata o Concello en horario de 09.00 a 14.00 horas de luns a venres. Alí, os traballadores de Servizos Sociais achegaranlles toda a información necesaria e axudaranos a tramitar estas subvencións.
Este plan, que pretende favorecer o envellecemento activo e saudable, ademais de fomentar o lecer entre as persoas de mediana idade, permitirá aos empadroados e ás empadroadas na provincia gozar de balnearios, talasos e spas con importantes descontos que varían en función da situación familiar do/a beneficiario/a.
O ‘Plan Depotermal’ conta cun total de 4.434 prazas que se distribúen entre:
a) Programa termal de asistencia diaria: acceso a balnearios, talasos ou spa durante cinco mañás ou tardes consecutivas, que contará con 1.248 prazas;
b) Programa termal con pernoita en réxime de pensión completa, de domingo a venres: acceso a balnearios, talasos ou spa, con pensión completa, que contará con 3.186 prazas.
Os requisitos para beneficiarche deste plan son:
a) Nacer antes do 1 de xaneiro de 1972 ou ter condición de pensionista (polos conceptos de xubilación, invalidez, viuvez, ou outros) ou unha invalidez do 65%;
b) Non padecer alteracións de comportamento que poidan perturbar a normal convivencia nos establecementos nin enfermidades con risco de contaxio
c) Poder valerse de maneira autónoma para as actividades da vida diaria
d) No caso de persoas con discapacidade, non ter recoñecida a necesidade de asistencia dunha terceira persoa.