O Alcalde de Soutomaior, Agustín Reguera, acudiu á sede da Confraría de Pescadores de Arcade para recibir en persoa a primeira remesa de semente de ameixa financiada polo goberno local para apoiar ao sector do marisqueo tras as perdas derivadas da mala climatoloxía do pasado inverno.

O investimento municipal ascende ata os 30.000 euros, co que a Confraría puido adquirir case 1.500kg de semente, uns 1,9 millóns de unidades.

A medida pretende axudar ao sector marisqueiro tras uns meses nos que as taxas de mortalidade dos moluscos disparáronse pola gran cantidade de choivas e o seu impacto na salinidade da auga, chegando a alcanzar cotas do 90%.

Con esta axuda, espérase que a Confraría poida facer fronte á nova campaña de sementado de ameixa nos bancos marisqueiros de Arcade e poida recobrar a normalidade tras uns anos problemáticos debido á inestabilidade meteorolóxica.

A primeira parte do pedido, algo máis de 700kg e 900.000 unidades de semente, recibiuse esta mañá e será utilizada polas mariscadoras de a pé para sementar as zonas inter mareales de Estralo e Alvedosas.

A segunda metade da compra destinarase a seménta do marisqueo á flote e está previsto recibila esta mesma semana.

A adquisición da semente de ameixa financiouse con fondos propios do Concello de Soutomaior e levou a cabo a través da firma do preceptivo convenio de colaboración coa Confraría.